गैळ बळद (गढ़वाली कविता)

जब बटे हमरु गैळ बळ्द
फेसबुक फर फेमस ह्वे
तब बटि
वो बळ्द/ बळ्द नि रै
सेलिब्रिटी बणिगे
अर मि
वेकु सबसे बड़ु फैन
उन्त सिर्फ मि ना
सर्या दुन्या आज वेकी फैन च
तबि त
वे दगड़ सेल्फी खिचाण वळों की
इतगा लम्बी लैन च
लोग पागल हुयां छन वेका बान
हर क्वी कनू च वेको गुणगान
लाइक कमेंट शेयर कना छन
लोग धड़ाधड़
क्वी दिल चिपकाणू च
क्वी अंगुठा दिखाणू च
क्वी वे तैं अपणि गौड़ी कु बोड़
त क्वी वे तैं
अपणि बाछी कु बुबा बताणू च
जैको ब्याळी तक क्वी कामकाज नि छौ
वो आज ये बळ्दै कान्ध कन्याणू च
चैनल वळा
हमारि छानि बटे लाइव प्रसारण कना छन
अर
वेका बारम् इनि- इनि बात ब्वना छन
जो मि तैं भि नि छन पता
जो जनम बटे छौं वे तैं घुळाणू
ठ्यली-ठ्यलि कै एक फांगी बवाणू
पर
अब टी.वी. मा ऐगे
त मि तैं भि वी ब्वन प्वड़णू च
कि जब बटे
हमरु गैळ बळ्द
फेसबुक फर फेमस ह्वे
तब बटि
वो बळ्द/ बळ्द नि रै..

• आशीष सुंदरियाल